૭૨૨ કિલો ગૌ-માંસ સહિત રૂ.૧.૯૫ લાખનો મુદ્દામાલ જપ્ત, એક આરોપી ઝડપાયો
(પ્રતિનિધિ)ગોધરા, ગોધરા શહેર બી ડિવિઝન પોલીસે ગૌવંશ કતલના મામલે મહત્વપૂર્ણ કાર્યવાહી હાથ ધરી ૭૨૨ કિલો ગૌ-માંસ સહિત કુલ રૂ.૧,૯૫,૦૪૦નો મુદ્દામાલ જપ્ત કર્યો છે. પોલીસે એક આરોપીની ધરપકડ કરી છે, જ્યારે અન્ય પાંચ આરોપીઓને વોન્ટેડ જાહેર કરી તેમની શોધખોળ શરૂ કરી છે.
પોલીસ પાસેથી પ્રાપ્ત વિગતો મુજબ, ૩૦ મેના રોજ ગોધરા શહેરના ચીખલી રોડ પર આવેલ મોડર્ન સ્ટીલ ફર્નિચરની પાછળના ખંડેર મકાન નજીક ઝાડીઓમાં ગૌવંશનું ગેરકાયદેસર કટીંગ કરવામાં આવી રહ્યું હોવાની બાતમીના આધારે દરોડો પાડવામાં આવ્યો હતો.
દરોડા દરમિયાન પાંચ બળદોની કતલ કરવામાં આવી હોવાનું સામે આવ્યું હતું. સ્થળ પરથી ૭૨૨ કિલો ગૌ-માંસ (કિંમત રૂ.૧,૪૪,૪૦૦), બે કુહાડી, બે છરી, લાકડાના ઢીબલા, તાડપત્રી, દોરડા, પ્લાસ્ટિકની થેલીઓ, ઝભલાં તેમજ એક સેન્ટ્રો કાર સહિત કુલ રૂ.૧,૯૫,૦૪૦નો મુદ્દામાલ કબજે કરવામાં આવ્યો હતો.
પોલીસે અખ્તર અબ્દુલગની મીર (રહે. ઈદગાહ મહોલ્લા, ગોધરા)ની ધરપકડ કરી હતી. જ્યારે કેસલ અબ્દુલરઉક ઉર્ફે સઉદહાજી બદામ, ઉસ્માન મહમદહનીફ હયાત, શાહરૂખ જાબીર ભુરા, મોહસીન ફારૂક દેવધા તથા ફેસલ અબ્દુલ સત્તાર ધંત્યા ઉર્ફે મગ્ગો સ્થળ પરથી ફરાર થઈ ગયા હતા.
આ અંગે ગોધરા શહેર બી ડિવિઝન પોલીસ સ્ટેશનમાં ગુજરાત પશુ સંરક્ષણ (સુધારા) અધિનિયમ-૨૦૧૧ તથા સુધારા-૨૦૧૭ની કલમ ૫(૧), ૬(એ), ૬(બી), ૮(૨), ૮(૪), ૧૦ તેમજ બી.એન.એસ. કલમ ૩૨૫ અને જી.પી. એક્ટ કલમ ૧૧૯ હેઠળ ગુનો નોંધવામાં આવ્યો છે. આ ગુનાની ફરિયાદ પોલીસ કર્મચારી ગણપતસિંહ ભીમસિંહ દ્વારા નોંધાવવામાં આવી છે. એફ.એસ.એલ.નો અહેવાલ પ્રાપ્ત થયા બાદ કાયદેસરની કાર્યવાહી હાથ ધરવામાં આવી હોવાનું પોલીસે જણાવ્યું છે. સમગ્ર મામલે વધુ તપાસ ચાલુ છે.
