રાષ્ટ્રપતિ વ્લાદિમીર પુતિનના નેતૃત્વમાં રશિયાએ તાજેતરમાં જ તેના સૌથી ઘાતક વ્યૂહાત્મક શસ્ત્રોનું પરીક્ષણ કરીને વૈશ્વિક સનસનાટી મચાવી દીધી છે. આમાં અણુશક્તિથી ચાલતી ક્રૂઝ મિસાઈલ ‘બુરેવેસ્ટનિક’ જે અમર્યાદિત અંતર કાપી શકે છે અને સબમરીન ડ્રોન ‘પોસાઈડોન’ છે જે પરમાણુ સુનામી પેદા કરવામાં સક્ષમ છે. હવે પુતિને જાહેરાત કરી છે કે રશિયાએ નેક્સ્ટ જનરેશન ન્યુક્લિયર પાવર્ડ ક્રુઝ મિસાઈલ વિકસાવવાનું શરૂ કરી દીધું છે.
ન્યૂઝ એજન્સી TASS અનુસાર, ક્રેમલિનમાં હથિયાર ડેવલપર્સને સન્માનિત કરવા માટે એક સમારોહને સંબોધિત કરતી વખતે પુતિને કહ્યું કે આ નવી મિસાઇલો અવાજની ઝડપ કરતાં ત્રણ ગણી વધુ ઝડપી હશે અને ભવિષ્યમાં તેમાં હાઇપરસોનિક ક્ષમતા હશે. તેમણે કહ્યું કે સંરક્ષણ ક્ષેત્રની તમામ યોજનાઓ (પછી તે શસ્ત્ર પ્રણાલીનો વિકાસ હોય કે પછી રશિયન આર્મી અને નેવીને આધુનિક શસ્ત્રોથી સજ્જ કરવાની હોય) પૂર્ણ ઝડપે અમલમાં આવી રહી છે. પુતિને વધુમાં જણાવ્યું હતું કે ‘અવાન્ગાર્ડ’ વ્યૂહાત્મક મિસાઈલ સિસ્ટમ હવે કોમ્બેટ ડ્યુટી માટે તૈનાત કરવામાં આવી છે.
TASS અનુસાર, પુતિને કહ્યું કે રશિયાએ ‘ઓરેશ્નિક’ મિડિયમ રેન્જ મિસાઈલ સિસ્ટમ તૈયાર કરી છે, તેને ફરજમાં મૂકી દેવામાં આવી છે અને તેનું મોટા પાયે ઉત્પાદન શરૂ થઈ ગયું છે. રશિયાના રાષ્ટ્રપતિએ કહ્યું કે ઇન્ટરકોન્ટિનેન્ટલ બેલેસ્ટિક મિસાઇલો અને સબમરીનથી લોન્ચ કરાયેલી મિસાઇલોને એડવાન્સ વોરહેડ્સથી સજ્જ કરવામાં આવી છે. આ પ્રસંગે પુતિને ‘બુરેવેસ્ટનિક’ મિસાઈલ અને ‘પોસાઈડોન’ માનવરહિત સબમરીનના વિકાસકર્તાઓને રાષ્ટ્રપતિ પુરસ્કાર અર્પણ કર્યા. તેમણે ભારપૂર્વક જણાવ્યું હતું કે રશિયા અને સમગ્ર 21મી સદી માટે પરમાણુ શસ્ત્રો ઐતિહાસિક મહત્વ ધરાવે છે.
પુતિને તેમના ભાષણમાં દાવો કર્યો હતો કે ‘બુરેવેસ્ટનિક’એ વિશ્વની તમામ જાણીતી મિસાઈલ સિસ્ટમને પાછળ છોડી દીધી છે. વધુમાં, તેણે ખુલાસો કર્યો હતો કે 21 ઓક્ટોબરે જ્યાં મિસાઈલનું પરીક્ષણ કરવામાં આવ્યું હતું તે વિસ્તારમાં નાટોનું એક જહાજ હાજર હતું, પરંતુ મોસ્કોએ તેની કામગીરીમાં અવરોધ ઉભો કર્યો ન હતો. ‘બુરેવેસ્ટનિક’ ઉપરાંત રશિયાએ તાજેતરમાં ‘પોસેઇડન’ (પરમાણુ સંચાલિત સબમરીન ડ્રોન)નું પરીક્ષણ કર્યું છે. ઉપરાંત, ‘ખાબારોવસ્ક’ નામની નવી પરમાણુ સબમરીન લોન્ચ કરવામાં આવી હતી, જે ખાસ કરીને આવા શસ્ત્રોને તૈનાત કરવા માટે બનાવવામાં આવી છે.
