સુરક્ષામાં તૈનાત પોલીસકર્મીઓના ભોજન માટે ચૂલા પર બને છે રસોઈ
(એજન્સી)ગાંધીનગર, રાજ્યમાં વર્તાઈ રહેલી એલપીજી ગેસની કટોકટી હવે સચિવાલય અને વિધાનસભા સુધી પહોંચી ગઈ છે. ગુજરાત વિધાનસભાની સુરક્ષામાં તહેનાત પોલીસ જવાનો માટેના ભોજનાલયમાં છેલ્લા પાંચ દિવસથી ગેસ સિલિન્ડર ન હોવાને કારણે લાકડાં અને ચૂલા પર રસોઈ બનાવવાની નોબત આવી છે.
સરકારના પૂરતા પુરવઠાના દાવાઓ વચ્ચે આ ઘટનાએ વહીવટી તંત્ર સામે ગંભીર સવાલો ઊભા કર્યાં છે. મળતી માહિતી અનુસાર, સચિવાલય પરિસરમાં સુરક્ષા વ્યવસ્થામાં જોડાયેલા આશરે ૧૫૦થી ૨૦૦ જેટલા પોલીસ જવાનો અને અધિકારીઓ માટે ભોજન તૈયાર કરતા કેટરિંગ યુનિટની હાલત કફોડી બની છે. છેલ્લા પાંચ દિવસથી ગેસની સપ્લાય ખોરવાતા કેટરિંગ સંચાલકોએ લાકડાં મંગાવીને કામચલાઉ ચૂલા પર રસોઈ શરૂ કરી છે.
લાકડાં પર રસોઈ બનાવવામાં વધુ સમય લાગતો હોવાથી પોલીસ જવાનોને સમયસર ભોજન મળવામાં મુશ્કેલી પડી રહી છે. ખુલ્લામાં અને ધુમાડા વચ્ચે ભોજન બનતું હોવાથી તેની ગુણવત્તા પર પણ અસર પડી રહી છે. ચોંકાવનારી બાબત એ છે કે, હજુ ગઈકાલે જ રાજ્યના અન્ન અને નાગરિક પુરવઠા સચિવ મોના ખંધારે જણાવ્યું હતું કે ‘રાજ્યમાં ૧૬થી ૧૮ દિવસ ચાલે તેટલો એલપીજીનો જથ્થો ઉપલબ્ધ છે.’
જો રાજ્યના હૃદય સમાન સચિવાલયમાં જ પોલીસના ભોજન માટે ગેસ ન મળતો હોય, તો સામાન્ય જનતાની હાલત કેવી હશે તે ચર્ચાનો વિષય બન્યો છે. કેટરિંગ સર્વિસના સંચાલકોના જણાવ્યાનુસાર,, ગેસ સપ્લાય માટે વારંવાર રજૂઆતો કરવામાં આવી છે, પરંતુ હજુ સુધી કોઈ ઉકેલ આવ્યો નથી. સવારે વહેલા રસોઈ શરૂ કરવી પડે છે અને ધુમાડાને કારણે રસોઈયાઓને પણ સ્વાસ્થ્યની સમસ્યાઓ નડી રહી છે.
માત્ર સચિવાલય જ નહીં, રાજ્યભરની ગેસ એજન્સીઓ પર સિલિન્ડર માટે લાંબી કતારો જોવા મળી રહી છે. આ સમસ્યાનો તાત્કાલિક ઉકેલ આવવો જરૂરી છે, જેથી સામાન્ય લોકો તેમજ ભોજનાલયોને પડતી મુશ્કેલીઓનો અંત આવી શકે.
