પાકિસ્તાનના ઉત્તર-પશ્ચિમ વિસ્તાર ઉત્તર વજીરિસ્તાનમાં શુક્રવારે મોટો આતંકવાદી હુમલો થયો હતો. એક આત્મઘાતી કાર બોમ્બર અને ત્રણ બંદૂકધારીઓએ એક ગામ નજીક લશ્કરી ચોકી પર હુમલો કર્યો, એક કલાક સુધી ચાલેલી ગોળીબારમાં ચાર પાકિસ્તાની સૈનિકો માર્યા ગયા. હુમલામાં મહિલાઓ અને બાળકો સહિત ઓછામાં ઓછા 15 નાગરિકો ઘાયલ થયા હતા.
પાકિસ્તાની સેના અને સ્થાનિક પોલીસના જણાવ્યા અનુસાર, આ વિસ્તાર ખૈબર પખ્તુનખ્વા પ્રાંતમાં આવે છે, જે અફઘાનિસ્તાનની સરહદે આવે છે અને ભૂતકાળમાં પાકિસ્તાની તાલિબાન અને અન્ય આતંકવાદી સંગઠનોનો ગઢ રહ્યો છે.
પોલીસે જણાવ્યું હતું કે વિસ્ફોટની તીવ્રતા એટલી વધારે હતી કે આસપાસના ઘણા મકાનો ધરાશાયી થયા હતા, જેના કારણે સ્થાનિક નાગરિકોને ગંભીર ઈજાઓ પહોંચી હતી. સેનાના નિવેદનમાં કહેવામાં આવ્યું છે કે તમામ હુમલાખોરોને એન્કાઉન્ટર દરમિયાન સુરક્ષા દળોએ માર્યા છે.
સેનાના જણાવ્યા અનુસાર, હુમલાખોરોએ પહેલા પોસ્ટની સુરક્ષા કોર્ડન તોડવાનો પ્રયાસ કર્યો હતો, પરંતુ તેમાં નિષ્ફળતા બાદ તેઓએ વિસ્ફોટકોથી ભરેલા વાહનને પોસ્ટની બહારની દિવાલ સાથે ટક્કર મારી દીધી હતી. વિસ્ફોટમાં નજીકના મકાનો અને એક મસ્જિદને પણ નુકસાન થયું હતું.
જો કે આ હુમલાની તાત્કાલિક કોઈ સંસ્થાએ જવાબદારી લીધી ન હતી, પરંતુ પાકિસ્તાની સેનાએ હુમલા માટે તહરીક-એ-તાલિબાન પાકિસ્તાન (TTP)ને જવાબદાર ઠેરવ્યું હતું. સેનાનો દાવો છે કે હુમલાની યોજના અફઘાન સરહદ પારથી કરવામાં આવી હતી.
