તમિલનાડુના ડિંડીગુલ જિલ્લામાં રોજીંદી મજૂરી કરનારની પુત્રી એસ નંદિનીએ તેની બારમા ધોરણની બોર્ડની પરીક્ષામાં તમામ વિષયોમાં 100 ટકા (600 માંથી 600 ગુણ) મેળવીને ઈતિહાસ રચ્યો છે. તમિલનાડુ એજ્યુકેશન બોર્ડ ધોરણ 12નું પરિણામ સોમવારે જાહેર કરવામાં આવ્યું હતું. નંદિનીએ અંગ્રેજી, અર્થશાસ્ત્ર, વાણિજ્ય, એકાઉન્ટન્સી અને કમ્પ્યુટર એપ્લિકેશન સહિત તમામ છ વિષયોમાં 100% માર્ક્સ મેળવ્યા છે.
એક મજૂરની પુત્રી નંદિની માટે આ એક અસાધારણ સિદ્ધિ છે, જે ડિંડીગુલની અન્નામલૈયાર મિલ્સ ગર્લ્સ હાયર સેકન્ડરી સ્કૂલમાં કોમર્સની વિદ્યાર્થીની છે. નંદિનીએ કહ્યું કે તેનો ઉદ્દેશ્ય શાળામાં ટોપ કરવાનો હતો, તેણે તમામ વિષયોમાં 100% માર્કસ મેળવવાની આશા નહોતી રાખી. તેણે કહ્યું કે તે ચાર્ટર્ડ એકાઉન્ટન્ટ બનવા માંગે છે.
નંદિનીએ કહ્યું કે તેણે કોઈપણ દબાણ વિના અભ્યાસ ચાલુ રાખીને આ સિદ્ધિ હાંસલ કરી છે અને તમામ છ વિષયોમાં 100% માર્ક્સ મેળવી તેની અપેક્ષાઓ કરતાં વધી ગઈ છે. તેણીએ કહ્યું કે તેના પરિવારની નબળી આર્થિક સ્થિતિએ તેણીને પરીક્ષામાં સારો દેખાવ કરવા પ્રેરણા આપી.
નંદિનીએ તેની શાળાના તમામ શિક્ષકોનો આભાર માન્યો અને કહ્યું કે તેણીને પરિવારનો સંપૂર્ણ સહયોગ મળ્યો જેના કારણે તેણીએ આ સિદ્ધિ મેળવી છે. નંદિની તમિલનાડુના બે વિદ્યાર્થીઓમાંથી એક છે જેમણે રાજ્યમાં બોર્ડની પરીક્ષામાં 100% ગુણ મેળવ્યા છે.
નંદિનીની અસાધારણ સિદ્ધિની તેના માતા-પિતા અને શાળા દ્વારા ઉજવણી કરવામાં આવી હતી. ઉલ્લેખનીય છે કે, આજે તામિલનાડુમાં 12માની પરીક્ષાનું પરિણામ જાહેર કરવામાં આવ્યું હતું. આ વખતે પણ છોકરીઓએ પરીક્ષાના પરિણામોમાં છોકરાઓને પાછળ રાખી દીધા છે. રાજ્યમાં પાસ થવાની ટકાવારી 94.03 ટકા રહી છે.