ટોરોન્ટો. કેનેડામાં, ગ્રેટર ટોરોન્ટો, વોન, બ્રોમ્પ્ટન અને સ્કારબરોના ત્રણ અલગ-અલગ વિસ્તારોમાં હિન્દી ફિલ્મો દર્શાવતા સિનેમાઘરોમાં કેટલાક માસ્ક પહેરેલા વ્યક્તિઓએ અજાણ્યા પદાર્થનો છંટકાવ કર્યા પછી, દર્શકોને બહાર કાઢવામાં આવ્યા હતા અને તેમના સંપર્કમાં આવેલા કેટલાક લોકોને સારવાર આપવામાં આવી હતી. આ ઘટના આ સપ્તાહની શરૂઆતમાં બની હતી.
કેનેડાની યોર્ક પ્રાદેશિક પોલીસે જણાવ્યું કે આવી જ ઘટના વોનના એક સિનેમા સંકુલમાં રાત્રે લગભગ 9.20 વાગ્યે બની હતી. પોલીસે જણાવ્યું હતું કે માસ્ક અને હૂડ પહેરેલા બે માણસોએ સિનેમા હોલની અંદર હવામાં એક અજાણ્યો અને એરોસોલ આધારિત પદાર્થ છાંટ્યો હતો, જેના કારણે ફિલ્મ જોનારા ઘણા લોકોને ઉધરસ આવી હતી. તે સમયે સિનેમામાં લગભગ 200 લોકો હતા. આ દરમિયાન સિનેમા હોલમાં એક હિન્દી ફિલ્મ દેખાડવામાં આવી રહી હતી.
પોલીસે જણાવ્યું હતું કે આ પદાર્થના સંપર્કમાં આવતા ઘણા લોકોની સારવાર કરવામાં આવી હતી અને થિયેટર ખાલી કરાવવું પડ્યું હતું. આ છંટકાવને કારણે કોઈ વ્યક્તિની સ્થિતિ ગંભીર નથી. પોલીસ પહોંચે તે પહેલા જ આરોપીઓ નાસી ગયા હતા. આ ઘટના સંદર્ભે હજુ સુધી કોઈ વ્યક્તિની ધરપકડ કરવામાં આવી નથી.