પ્રોફેસર હિમાંશુ પંડ્યાનો કાર્યકાળ 30 જૂને પૂરો થયો અને નવા કુલપતિની નિમણૂક કરવામાં આવી
ગુજરાત યુનિવર્સિટીના નવા કુલપતિ તરીકે ડો.નિરજા ગુપ્તાની નિમણૂક કરવામાં આવી છે. આ સાથે નીરજા ગુપ્તા ગુજરાત યુનિવર્સિટીના પ્રથમ મહિલા કુલપતિ બન્યા છે. ગુજરાત યુનિવર્સિટીના કુલપતિ ડો.હિમાંશુ પંડ્યાની બીજી ટર્મ આખરે પૂરી થઈ ગઈ છે. પ્રો.હિમાંશુ પંડ્યાનો કાર્યકાળ 30મી જૂને પૂરો થયા બાદ નવા કુલપતિની નિમણૂકને લઈને અનેક અટકળો ચાલી રહી હતી, હવે પ્રો. નીરજા ગુપ્તાની નિમણૂક સાથે તમામ અટકળોનો અંત આવી ગયો છે.
ડોક્ટર. નીરજા ગુપ્તા ભવન કોલેજ ઓફ આર્ટસ એન્ડ કોમર્સ, ભારતીય વિદ્યા ભવન, ખાનપુર, અમદાવાદ, ગુજરાત ખાતે પ્રોફેસર અને પ્રિન્સિપાલ રહી ચુક્યા છે. તેઓ એકેડેમિક કાઉન્સિલના સભ્ય પણ રહી ચૂક્યા છે. 2006 થી 2012 સુધી ડૉ. ગુપ્તા ગુજરાત યુનિવર્સિટી, અમદાવાદના ફોરેન એજ્યુકેશન પ્રોગ્રામના સલાહકાર રહી ચૂક્યા છે. તેમણે 1992માં મેરઠ યુનિવર્સિટીમાંથી ડોક્ટરેટની પદવી મેળવી હતી.
તેમના બે કાર્યકાળ દરમિયાન યુનિવર્સિટીમાં થયેલા વિકાસના કામો અંગે પ્રો. હિમાંશુ પંડ્યા ખૂબ ચર્ચામાં રહ્યા હતા. નવા કુલપતિ માટે સર્ચ કમિટીની રચના કરવામાં આવી હતી. સર્ચ કમિટીએ જાહેરાતો આપીને ઉમેદવારો પાસેથી અરજીઓ મંગાવી હતી. જેમાં 100 થી વધુ ઉમેદવારોએ અરજી કરી હતી.