ભારતની પ્રથમ સ્વદેશી લાઈટ ટેન્ક ઝોરાવરનું પરીક્ષણ શરૂ થઈ ગયું છે. ડિફેન્સ રિસર્ચ એન્ડ ડેવલપમેન્ટ ઓર્ગેનાઈઝેશન (DRDO)ને આશા છે કે એપ્રિલ સુધીમાં તેને ભારતીય સેનાને સોંપવામાં આવી શકે છે. સંરક્ષણ અધિકારીઓએ જણાવ્યું કે નવા એન્જિન સાથે લાઇટ ટેન્ક બનાવવાનું કામ શરૂ થઈ ગયું છે. ટેન્કોને 100 કિલોમીટરથી વધુના અંતરે ખસેડવામાં આવી હતી. આ વર્ષે એપ્રિલ સુધીમાં ભારતીય સેનાને તેની સપ્લાય કરવામાં આવે તેવી શક્યતા છે.
સેનાએ DRDOને 59 જોરાવર લાઇટ ટેન્કના ઉત્પાદન અને સપ્લાય માટે ઓર્ડર આપ્યો છે. આ લાર્સન એન્ડ ટુબ્રોના સહયોગથી બનાવવામાં આવી રહી છે. આ લાઇટ ટેન્ક પહેલી ટેન્ક હતી જે ડિસેમ્બરમાં ભારતીય સેનાને રણ અને ઊંચાઈવાળા સ્થળો પર પરીક્ષણ માટે આપવામાં આવી હતી. જોકે, જર્મનીથી એન્જિનના પુરવઠામાં વિલંબને કારણે પ્રોજેક્ટમાં વિલંબ થયો હતો.
ભારતીય સેના એક અલગ પ્રોગ્રામ હેઠળ 295 વધુ લાઇટ ટેન્ક ખરીદવા માટે ટેન્ડર બહાર પાડશે. આ માટે છથી સાત કંપનીઓ તેમની લાઇટ ટેન્ક રજૂ કરશે. ભારતીય સેના આ મેગા પ્રોજેક્ટને સંપૂર્ણ સમર્થન આપે છે. તે ખાનગી ક્ષેત્રની કંપનીઓ સાથે મળીને વિશ્વ કક્ષાની શસ્ત્ર પ્રણાલીઓનું ઉત્પાદન કરી રહી છે.અધિકારીઓના જણાવ્યા અનુસાર, ભારતીય સેના લદ્દાખ સેક્ટરમાં તેની ગતિશીલતા અને દાવપેચને સુધારવા માટે લાઇટ ટેન્ક પ્રોજેક્ટ પર કામ કરી રહી છે. ચીને પણ અહીં મોટી સંખ્યામાં પોતાની લાઇટ ટેન્ક તૈનાત કરી છે.