ડીસા અને તાલુકાના લોકોને આધારકાર્ડ અપડેટ કરવામાં ભારે મુશ્કેલીનો સામનો કરવો પડી રહ્યો છે અને લોકોને સરકારી કચેરી દ્વારા ધમકાવવામાં આવી રહી છે.આધાર કાર્ડ સેન્ટરમાં લાંબા સમયથી ચાલતી ગેરરીતિના કારણે લોકોને મુશ્કેલીનો સામનો કરવો પડી રહ્યો છે. જેના કારણે ગુરુવારે 100 થી વધુ અરજદારોનું ટોળું ડીસા મામલતદાર કચેરીમાં રજૂઆત કરવા માટે આવ્યું હતું, ત્યારબાદ મામલતદારે તેમને સમજાવ્યું હતું કે નવું આધાર કાર્ડ સેન્ટર ખોલવા માટે પ્રયાસો ચાલુ છે. હવે દરેક પ્રકારના કામ માટે આધાર કાર્ડ ફરજિયાત બની ગયું છે. ત્યારે નવા આધાર કાર્ડ બનાવવા અને અપડેટ કરવા માટે ડીસામાં એક જ સેન્ટર ખુલ્લુ હોવાથી લોકોનો ભારે ધસારો જોવા મળી રહ્યો છે. ડીસામાં એક-બે બેંકની શાખાઓમાં આધારકાર્ડ કેન્દ્રો ચાલી રહ્યા છે. તેમજ શનિવાર-રવિવારની રજા, જાહેર રજા, ઓપરેટરની ગેરહાજરી જેવી સમસ્યાઓના કારણે લોકોને મામલતદાર કચેરીના પ્રાંગણમાં આવેલા એકમાત્ર આધાર કેન્દ્ર પર નિર્ભર રહેવું પડે છે. આ અંગે ડીસા શહેર મામલતદાર એસ.ડી. બોડાણાએ જણાવ્યું હતું કે ડીસા ખાતેના આધારકાર્ડ કેન્દ્રમાં નવા આધાર કાર્ડ ખોલવા અને તેની ક્ષમતા વધારવા માટેની મંજૂરીની પ્રક્રિયા ચાલી રહી છે. મંજુરી મળતાં જ બીજું આધાર કાર્ડ સેન્ટર ખોલવામાં આવશે અને આજે પ્રિન્ટર તૂટી ગયું છે, જેના કારણે લોકોને થોડી અગવડતાનો સામનો કરવો પડી રહ્યો છે. તાત્કાલિક કાર્યવાહી કરવામાં આવશે.