ડીસા તાલુકાના બાયવાડા ગામે રહેતા પથુભાઈ દલિત તેમના પત્ની ગીતાબેન સાથે બાઇક પર તેમની પુત્રીના સાસરે ગામ ઓઢવા જવા નીકળ્યા હતા અને ત્યાંથી બાઇક પર બાયવાડા તરફ આવી રહ્યા હતા. તેઓ સોદાપુર ગામ નજીકથી પસાર થતા હતા ત્યારે અચાનક બાઇકે સ્ટેરીંગ પરનો કાબુ ગુમાવતા અકસ્માત સર્જાયો હતો અને ત્રણેય બાઇક સવારો રોડ પર પટકાયા હતા. જેમાં પથુભાઈ રોડની બાજુમાં આવેલી લોખંડની સેફ્ટી ગ્રીલ સાથે અથડાતા તેનું માથાના ભાગે ગંભીર ઈજા થતાં ઘટના સ્થળે જ મોત નીપજ્યું હતું.
જ્યારે તેમના પત્ની ગીતાબેન અને પુત્રીને પણ ગંભીર ઈજાઓ પહોંચી હતી. ઘટના બાદ રાહદારીઓ, 108 એમ્બ્યુલન્સ વાન અને પોલીસની ટીમ ઘટના સ્થળે પહોંચી હતી અને બંને ઇજાગ્રસ્ત માતા-પુત્રીને પાલનપુર સરકારી હોસ્પિટલમાં સારવાર અર્થે ખસેડવામાં આવ્યા હતા. મૃતકના મૃતદેહનું પીએમ કરાવી પોલીસે આગળની કાર્યવાહી હાથ ધરી હતી.