પાટણના બાલીસણા ગામમાં ગઈકાલે રાત્રે સોશિયલ મીડિયા પર પોસ્ટને લઈને બે જૂથો સામસામે આવી ગયા હતા. લોખંડના પાઈપ, ધારિયા, પથ્થરો સહિતના હથિયારો સાથે સામ-સામે મારામારી થતાં તંગદિલીભર્યું વાતાવરણ સર્જાયું હતું. બંનેએ એકબીજા પર લાકડીઓ અને સળિયા વડે હુમલો કરતાં ત્રણ લોકો ઘાયલ થયા હતા. આ ઘટના બાદ બંને જૂથોએ પોલીસ સ્ટેશનમાં ફરિયાદ નોંધાવી હતી. કુલ 12 લોકો સામે ગુનો નોંધવામાં આવ્યો છે. આ સાથે ગામમાં કડક પોલીસ બંદોબસ્ત ગોઠવી દેવામાં આવ્યો છે.
પાટણના બાલીસણા ગામમાં રાત્રે સોશિયલ મીડિયા પર પોસ્ટ કરવાના વિવાદને કારણે સ્થિતિ વણસી હતી. જેમાં રાત્રીના સમયે અલગ-અલગ સમાજના બે જૂથ વચ્ચે ઝઘડો થયો હતો. બંને જૂથના લોકોએ એકબીજા પર હુમલો કરતા મારામારીના દ્રશ્યો સર્જાયા હતા. બે જૂથ વચ્ચે અથડામણ થતાં ગામમાં તંગદિલીનો માહોલ સર્જાયો હતો. કોઇ અનિચ્છનીય બનાવ ન બને તે માટે જિલ્લા પોલીસનો કાફલો ગામ તરફ રવાના થયો હતો. બનાવ અંગે પોલીસે બંને જૂથની ફરિયાદ લઈ વધુ તપાસ હાથ ધરી છે. આ ઘટના બાદ રૂબરૂ ફરિયાદ નોંધાવવામાં આવી છે. એક સમાજે બંને યુવકો સામે ફરિયાદ નોંધાવી છે. જ્યારે સામા પક્ષે ટોળા સહિત 10 લોકો સામે ફરિયાદ નોંધાવી છે.