ઈરાનથી આવતા કિવી, સફરઝનની આવક બંધ: કેળા, કેરી, દ્રાક્ષનું એકસપોર્ટ ખોરવાયું
ભારતમાંથી મિડલ ઈસ્ટના દેશો ઈરાન, સઉદી અરબ, દુબઈ, કતાર, બહેરીન, મશ્કત, કુવૈતમાં કેળા, કેરી, દ્રાક્ષની નિકાસ થતી હતી તેમાં ફટકો પડયો છે.
સુરત, વૈશ્વિક સ્તરે પ્રવર્તી રહેલી યુદ્ધની પરસ્થિતિ અને હોર્મુઝ ખાડીના ઈસ્યુના પગલે સુરત શહેર સહિત દક્ષિણ ગુજરાતમાં ઈરાનથી આવતા કિવી અને સફરઝનની આવક સંપૂર્ણ બંધ થઈ છે.
બીજી તરફ ભારતમાંથી કેરી, કેળા, દ્રાક્ષ, ટામેટાની મિડલ ઈસ્ટના દેશોમાં નિકાલ થતી હતી તેમાં પણ એકસપોર્ટરો અને વેપારીઓને મોટો ફટકો પડયો છે. આ કારણે ફળોના ભાવમાં પણ ૧પથી ર૦ ટકાનો ઉછાળો આવ્યો છે.
ભારત દેશમાં ન્યુઝીલેન્ડ, પોલેન્ડ, સાઉથ આફ્રિકા, અમેરિકા, ઈટલી, ફ્રાન્સ, ઈરાન જેવા દેશોમાંથી ફળોની આયાત થાય છે તો ભારતમાંથી પણ કેળા, ટમેટા, કેરી, દ્રાક્ષ તથા અન્ય ફળોની પણ નિકાસ થતી હોય છે. મોટાભાગના ફળોની આયાત-નિકાસ ઈરાનની હોર્મુઝ ખાડી થઈને કન્ટેઈનરોમાં આવે છે.
હાલ હોર્મુઝ ખાડીમાં જહાજોની અવર-જવર અવરોધાઈ હોવાથી ફળો પણ મળવા મુશ્કેલ બની રહ્યા છે. એપીએમસીના ડિરેકટર બાબુ શેખે જણાવ્યું કે, અત્યાર સુધી ફળો હોર્મુઝ ખાડી થઈને મુંબઈના નવાશેવા પોર્ટ પર ઉતરતા હતા અને ત્યાંથી ભારતભરમાં સપ્લાય થતા હતા.
હોર્મુજ ખાડીનો રૂટ પર અવર-જવર ઓછી થતાં હવે એકસપોર્ટરો નવા રસ્તાઓ પરથી ફળોની આયાત કરે છે જેના કારણે જે ફળો દસ દિવસમાં આવતા હતા તે હવે મહિનોથી પણ વધુ સમય થઈ જાય છે.
લાંબો સમય થતો હોવાથી ફળોમાં નુકસાન થઈ રહ્યું હોવાથી ટ્રાન્સપોર્ટરોએ પણ નુકસાન વેઠવું પડી રહ્યું છે. આ બધા પરિબળોને કારણે વિદેશથી આયાત થતાં ફળોની કિંમતમાં ૧પથી ર૦ ટકા વધારો થયો છે. બીજી તરફ મિડલ ઈસ્ટમાં યુદ્ધને કારણે ઈરાનથી કિવી અને સફરઝન છે.
એટલું જ નહીં ભારતમાંથી મિડલ ઈસ્ટના દેશો ઈરાન, સઉદી અરબ, દુબઈ, કતાર, બહેરીન, મશ્કત, કુવૈતમાં કેળા, કેરી, દ્રાક્ષની નિકાસ થતી હતી તેમાં ફટકો પડયો છે. જેથી નુકસાન વધી રહ્યું હોવાથી વેપારીઓ અને એકસપોર્ટરો યુદ્ધ ઝડપથી સમાપ્ત થાય તેવી પ્રાર્થના કરી રહ્યા છે.
