મહેસાણા, મહેસાણા મનપા વિસ્તારના ડ્રાફ્ટ ડેવલપમેન્ટ પ્લાનમાં ૮૦ મીટર રિંગ રોડનો છ જેટલા ગામોએ વિરોધ કર્યાે છે ત્યારે મંગળવારે તાવડિયાના ગ્રામજનોએ ચૂંટણી બહિષ્કારનું બેનર લગાવી વિરોધ ઉગ્ર કરી રિંગ રોડ તેમના ગામથી દૂર ખસેડવાની માંગ કરી છે.
મહેસાણા મહાનગરપાલિકાની રચના બાદ તેમાં સમાવાયેલાં ૨૪ ગામો સહિતના વિસ્તારનો ડ્રાફ્ટ ડેવલપમેન્ટ પ્લાન સરકારમાં મંજૂર કરાવીને જાહેર કરાયો છે. જેમાં નવા ભળેલા ગ્રામ્ય વિસ્તારોમાં પહોળા ડીપી રોડ ઉપરાંત હયાત ૬૦ મીટર બાયપાસને ૮૦ મીટરનો તેમજ તેની સાથે પૂર્વ વિસ્તારમાંથી નવો ૮૦ મીટર રોડ મુકીને રિંગ રોડ દર્શાવવામાં આવ્યો છે.
આ ૮૦ મીટર રોડ જે ગામોમાંથી પસાર થાય છે તે પૈકીનાં તાવડિયા, દેલા, ઉચરપી, રામપુરા અને રૂપાલ ગામોમાં ખેડૂતોની જમીન છીનવાઈ જવાના મુદ્દે ભારે વિરોધ થઈ રહ્યો છે. ભારતમાલા સહિત વિવિધ પ્રોજેક્ટમાં જમીન ગઈ છે, મનપાના કારણે ૪૦ ટકા કપાત થાય છે અને હવે રિંગરોડમાં જમીન જતાં ટૂંકી જમીન ધરાવતા ખેડૂતોની આજીવીકા પણ છીનવાઈ જશે તેવો સૂર ગ્રામજનો વ્યક્ત કરી રહ્યા છે, ગ્રામજનો રિંગ રોડ દૂર ખસેડવાની માગણી સાથે ગામમાં સભાઓ કરીને વિરોધ નોંધાવી રહ્યા છે ત્યારે મંગળવારે તાવડિયા ગામમાં મનપાની આગામી ચૂંટણીનો બહિષ્કાર કરવાની ચીમકી સાથેનાં બેનર લાગ્યાં હતાં અને ગ્રામજનોએ એકઠા થઈને ઉગ્ર વિરોધ નોંધાવ્યો છે. જેમાં ગામમાં કોઈપણ રાજકીય પક્ષોએ પ્રવેશ કરવો નહીં તેમ પણ કહીં દેવાયું છે. ૮૦ મીટર રિંગ રોડ દૂર ખસેડવા ઉપરાંત તેમણે ગામમાં મુકેલો ઈન્ડસ્ટ્રીયલ ઝોન રદ કરી એગ્રીકલ્ચર ઝોન મુકવાની માંગ પણ કરી છે.SS1MS
