ડીસા, ડીસા તાલુકાની શ્રી ગેનાજી ગોળીયા દૂધ ઉત્પાદક સેવા સહકારી મંડળીમાં દૂધ ચોરીનું મોટું કૌભાંડ પ્રકાશમાં આવતા ચકચાર મચી ગઈ છે. રાત્રિના સમયે એકલતાનો લાભ લઈ ટેન્કરમાંથી દૂધ ચોરી કરનાર ટેસ્ટરને સીસીટીવી કૂટેજના આધારે ઝડપી પાડી બનાસ ડેરી દ્વારા સસ્પેન્ડ કરવામાં આવ્યો છે.
ગેનાજી ગોળીયા દૂધ મંડળીમાં ૧૦,૦૦૦થી વધુ પશુપાલકો દૂધ ભરાવે છે. અહીં ટેસ્ટર તરીકે ફરજ બજાવતો સંજયકુમાર રમેશભાઈ ગેલોત (માળી) છેલ્લા એક વર્ષથી રાત્રિના સમયે બલ્ક યુનિટના ટેન્કરમાંથી આશરે ર૦ લિટર જેટલું દૂધ કાઢી લેતો હતો. આ ચોરી કરેલું દૂધ તે સવારના સમયે પોતાના જ ખાતા નંબર ૧પ૯૦માં જમા કરાવી દેતો હતો.
બનાસ ડેરીના બલ્ક રૂટોમાં દૂધની સતત ઘટ આવતી હોવાનું ધ્યાન પર આવતા મંડળીના મંત્રી ઈશ્વરજી છોગાજી ગેલોત અને ચેરમેન શંકરજી દલાજી ગેલોતે તપાસ હાથ ધરી હતી. મંડળીના સીસીટીવી કેમેરા ચેક કરતા ટેસ્ટર સંજયકુમારની આ કરતૂત કેમેરામાં કેદ થઈ ગઈ હતી. આ મામલે બનાસ ડેરીના અધિકારી ભરતભાઈ પટેલને જાણ કરવામાં આવતા તેમણે તાત્કાલિક અસરથી ટેસ્ટર સંજયકુમાર ગેલોતને સસ્પેન્ડ કરવાનો આદેશ આપ્યો છે.
છેલ્લા એક વર્ષથી કેટલી માત્રામાં દૂધની ચોરી થઈ છે તેની તપાસ શરૂ કરવામાં આવી છે. નુકશાનની ગણતરી કર્યા બાદ આરોપી પાસેથી મસમોટો દંડ વસૂલવાની કાર્યવાહી કરવામાં આવશે. નોંધનીય છે કે, શ્રી ગેનાજી ગોળીયા દૂધ મંડળી અગાઉ પણ વિવાદોમાં રહી છે. આ પહેલા પણ આ મંડળીમાં ૬ર લાખ રૂપિયાથી વધુનું કૌભાંડ થયું હોવાનું સામે આવ્યું હતું.
ત્યારે ફરી એકવાર ટેસ્ટર દ્વારા કરવામાં આવેલી આ ઉચાપતે પશુપાલકોમાં રોષ અને સ્થાનિકસ્તરે ભારે ચર્ચા જગાવી છે. દૂધમાં થયેલી ઘટની તપાસ ચાલુ છે. ચોક્કસ માત્રા નકકી થયા બાદ તે મુજબ દંડ ફટકારવામાં આવશે. ગેરરીતિ કરનાર સામે બનાસ ડેરી હંમેશા કડક વલણ રાખશે’ તેમ ભરતભાઈ પટેલે (અધિકારી, બનાસ ડેરી) જણાવ્યું હતું.
