પંચમહાલમાં ચોરીની ઇકો ગાડીઓના કૌભાંડનો પર્દાફાશ
(પ્રતિનિધિ) ગોધરા, પંચમહાલ જિલ્લામાં ચોરીના વાહનોને કાયદેસર બતાવી વેચવાના મોટા રેકેટનો પર્દાફાશ પંચમહાલ એસઓજી પોલીસે કર્યો છે. આરોપીઓ ચોરીની ગાડીઓને લીગલ દેખાડવા માટે સ્ક્રેપ થયેલી ગાડીઓના ચેસીસ નંબર અને નંબર પ્લેટનો ગેરકાયદેસર ઉપયોગ કરતા હોવાનું સામે આવ્યું છે.
એસઓજી પોલીસને મળેલી બાતમીના આધારે તપાસ શરૂ કરવામાં આવી હતી. તપાસ દરમિયાન ગોધરાના સિમલા વિસ્તારમાં આવેલી “ઉસ્માની સ્ક્રેપ” નામની દુકાન પર દરોડા પાડવામાં આવ્યા હતા. ત્યાંથી પોલીસે મોટી માત્રામાં શંકાસ્પદ સામગ્રી કબજે કરી હતી.
જેમાં જુદા-જુદા આરટીઓ રજીસ્ટ્રેશન નંબરવાળી ૩૪ નંબર પ્લેટો, ૩૩ જેટલી ચેસીસ નંબર લખેલી કાપેલી લોખંડની પ્લેટો તેમજ ૧૬ જેટલા વાહનોની મૂળ આર.સી. બુક મળી આવી હતી.
આ કાર્યવાહી દરમિયાન વસીમ સિદ્દીક સમોલ નામના આરોપીની ધરપકડ કરવામાં આવી હતી. તેની પૂછપરછમાં ખુલ્યું કે તે જૂની અથવા અકસ્માતગ્રસ્ત ઈકો ગાડીઓ તેમની ઓરિજિનલ આર.સી. બુક સાથે ખરીદતો હતો.
ત્યારબાદ ગાડીઓને સ્ક્રેપ કરીને ગેસ કટરથી ચેસીસ નંબરનો ભાગ કાપી લેતો અને તે નંબર ચોરીની ઈકો ગાડીઓ પર લગાવતો હતો, જેથી વાહન કાયદેસર દેખાય. આ રીતે બનાવટી રીતે તૈયાર કરેલી ગાડીઓ ઓરિજિનલ આર.સી. બુકના આધારે કમિશન લઈને અન્ય લોકોને વેચી દેતો અને તેમના નામે ટ્રાન્સફર પણ કરાવી આપતો હતો.
પોલીસે આ રેકેટનો પર્દાફાશ કરીને જુદા-જુદા જિલ્લાઓમાંથી ચોરી થયેલી કુલ ૪ ઈકો ગાડીઓ રિકવર કરી છે, જેની કુલ કિંમત આશરે રૂ. ૧૦.૨૦ લાખ થાય છે. આ મામલે સુરતના કાપોદરા અને ઉધના પોલીસ સ્ટેશન, ગાંધીનગરના કલોલ ટાઉન તેમજ નવસારી ટાઉન પોલીસ સ્ટેશનમાં નોંધાયેલા ચાર ગુનાઓનો પણ ભેદ ઉકેલાયો છે.હાલ પોલીસ દ્વારા સમગ્ર રેકેટની વધુ તપાસ હાથ ધરવામાં આવી છે અને અન્ય સંડોવાયેલા આરોપીઓ સુધી પહોંચવાના પ્રયાસો ચાલુ છે.
