પૂર્વ વડાપ્રધાન કેપી શર્મા ઓલીની પાર્ટી CPN-UMLના ‘જનરલ-જી’ યુવાનો અને કાર્યકરો વચ્ચે હિંસક અથડામણ બાદ બુધવારે ભારતની સરહદે આવેલા નેપાળના બારા જિલ્લાના કેટલાક વિસ્તારોમાં કર્ફ્યુ લાદવામાં આવ્યો હતો. બારા જિલ્લા પ્રશાસને જણાવ્યું કે સિમરા એરપોર્ટના 500 મીટરની અંદર બપોરે 12:30 થી 8 વાગ્યા સુધી કર્ફ્યુ રહેશે. વાસ્તવમાં, સેંકડો ‘જનરલ-જી’ યુવાનો નેપાળ કમ્યુનિસ્ટ પાર્ટી (યુનિફાઈડ માર્ક્સિસ્ટ-લેનિનિસ્ટ) એટલે કે CPN-UML વિરુદ્ધ સૂત્રોચ્ચાર કરતા ત્યાં એકઠા થયા હતા.
કહેવામાં આવી રહ્યું છે કે ગુરુવારે પણ પ્રદર્શનકારીઓ રસ્તા પર ઉતરી આવ્યા હતા. સવારથી લોકો સિમરાના રસ્તાઓ પર એકઠા થવા લાગ્યા અને પોલીસ સાથે ઘર્ષણ શરૂ થયું. આ ઘટના બાદ પ્રશાસને પરિસ્થિતિને કાબૂમાં લેવા માટે બપોરે 1 વાગ્યાથી 8 વાગ્યા સુધી કર્ફ્યુ લગાવી દીધો છે. મદદનીશ મુખ્ય જિલ્લા અધિકારી છબીરામ સુબેદીએ ફોન પર સમાચાર એજન્સી ANIને જણાવ્યું કે પોલીસ સાથેની અથડામણ બાદ સ્થિતિ નિયંત્રણની બહાર જઈ રહી છે, તેથી ફરી કર્ફ્યુ લગાવવો પડ્યો.
શું છે સમગ્ર મામલો
પોલીસના જણાવ્યા અનુસાર, અથડામણ ત્યારે શરૂ થઈ જ્યારે બુદ્ધ એરનું વિમાન કાઠમંડુથી સીપીએન-યુએમએલના મહાસચિવ શંકર પોખરેલ અને પાર્ટીના યુવા નેતા મહેશ બસનેતને લઈને સિમરા માટે ઉપડવાનું હતું. બંને નેતાઓ ત્યાં સરકાર વિરોધી રેલીને સંબોધવાના હતા.
સિમરામાં તેમના આગમનના સમાચાર ફેલાતા જ જનરલ-જી વિરોધીઓ સ્થળ પર પહોંચી ગયા અને તેમનો વિરોધ કરવા લાગ્યા. વિરોધ દરમિયાન હાજર સ્થાનિક CPN-UML કાર્યકર્તાઓ સાથે તેમની અથડામણ થઈ હતી. અને થોડી જ વારમાં મામલો ગંભીર બની ગયો. આ પછી પોલીસ પ્રશાસને ચાર્જ સંભાળ્યો અને બધાને ત્યાંથી હટાવ્યા.
જણાવવામાં આવી રહ્યું છે કે આ ઘટના બાદ બુદ્ધ એરલાઈન્સે કાઠમંડુથી સિમરાની તમામ ડોમેસ્ટિક ફ્લાઈટ્સ કેન્સલ કરી દીધી છે. નોંધનીય છે કે CPN-UML સમગ્ર નેપાળમાં વિરોધ પ્રદર્શન કરી રહ્યું છે અને 12 સપ્ટેમ્બરે ભંગ કરવામાં આવેલ હાઉસ ઓફ રિપ્રેઝન્ટેટિવને પુનઃસ્થાપિત કરવાની માંગ કરી રહ્યું છે. તમને જણાવી દઈએ કે જનરલ-ઝેડ આંદોલનને કારણે નેપાળમાં કેપી શર્મા ઓલીની આગેવાની હેઠળની સરકાર પડી ગઈ હતી.
