વાહન નાનું હોય કે મોટું, તેની ઝડપને કારણે અકસ્માતો સર્જાય છે. ત્યારે મોડાસાના સાબલપુર પાસે પણ આવો જ એક અકસ્માત થયો હતો. મોડાસાથી હિંમતનગર તરફ જતા સાબલપુર ગામ પાસે મોડી સાંજે બે કાર સામસામે અથડાઈ હતી. બંને કારની સ્પીડ વધુ હોવાથી બંને કાર એકબીજા સાથે અથડાઈ હતી અને કારમાં સવાર કુલ 6 લોકો ઈજાગ્રસ્ત થયા હતા. અકસ્માતની જાણ થતાં આસપાસના લોકો ઘટના સ્થળે પહોંચી ગયા હતા. ઇજાગ્રસ્તને કારમાંથી બહાર કાઢી 108 નંબર મારફતે સારવાર માટે સાર્વજનિક હોસ્પિટલમાં લઇ જવાયો હતો. ઘટના બાદ મોડાસા રૂલર પોલીસે ઘટના સ્થળે પહોંચી કાયદેસરની કાર્યવાહી હાથ ધરી હતી.