(જીએનએસ), 21
21 જૂન એટલે આંતરરાષ્ટ્રીય યોગ દિવસ, ભારત સહિત સમગ્ર વિશ્વમાં આંતરરાષ્ટ્રીય યોગ દિવસની ઉત્સાહભેર ઉજવણી કરવામાં આવે છે. સુરતે આજે આંતરરાષ્ટ્રીય યોગ દિવસની ઉજવણીમાં ઈતિહાસ રચ્યો છે. સુરતમાં રાજ્યકક્ષાના યોગ દિવસની ઉજવણી કરવામાં આવી હતી. જેમાં એક જ સ્થળે 1.50 લાખથી વધુ લોકોએ ઉપસ્થિત રહી યોગાસન કરીને વિશ્વ વિક્રમ સર્જ્યો હતો. સૌથી વધુ લોકો એકસાથે યોગ કરવા માટે સુરતને ગિનિસ બુક ઓફ વર્લ્ડ રેકોર્ડમાં સ્થાન મળ્યું છે.
સુરતમાં રાજ્યકક્ષાએ વિશ્વ યોગ દિવસની ઉજવણીનું આયોજન કરવામાં આવ્યું હતું. સુરતના વાય જંકશન ખાતે મુખ્યમંત્રી ભૂપેન્દ્ર પટેલ અને ગૃહમંત્રી હર્ષ સિંઘવીની અધ્યક્ષતામાં યોગ દિવસની ઉજવણી કરવામાં આવી હતી. આ ઉજવણીમાં ભાજપના પ્રદેશ પ્રમુખ સી.આર. પાટીલ સહિતના રાજકીય તેમજ સામાજિક આગેવાનો જોડાયા હતા.
યોગ દિવસની ઉજવણીમાં શહેરની શાળા કોલેજના વિદ્યાર્થીઓ, શિક્ષકો, શહેરવાસીઓ તેમજ વિવિધ વ્યવસાયના નાગરિકો અને ગૃહિણીઓ સહિત કુલ 1.50 લાખથી વધુ લોકોએ ભાગ લીધો હતો.સુરતના વાય જંકશનથી એસવીએનઆઈટી સર્કલ સુધી 1.50 લાખથી વધુ લોકોએ યોગાસન કર્યું હતું. એકસાથે યોગ કરીને ગિનિસ બુક ઓફ વર્લ્ડ રેકોર્ડમાં સ્થાન મેળવ્યું. આ પહેલા જયપુરના નામે 1.09 લાખનો રેકોર્ડ હતો.
સુરતના મગદલ્લાભાઈ જંકશનથી એસવીએનઆઈટી સર્કલ અને બ્રેડલાઈનર સર્કલ સુધીના 12 કિલોમીટરના રૂટ પર આ કાર્યક્રમનું આયોજન કરવામાં આવ્યું હતું. યોગાભ્યાસમાં ભાગ લેવા માટે 42 શાળાઓના 20 હજારથી વધુ બાળકો વહેલી સવારથી જ કાર્યક્રમ સ્થળે પહોંચ્યા હતા. આ ઉપરાંત શહેરના દરેક નાના-મોટા આગેવાનો સહિત ગૃહિણીઓ અને વિવિધ વ્યવસાય સાથે સંકળાયેલા નાગરિકો ઉપસ્થિત રહ્યા હતા. આ ઉપરાંત વિદેશી મહેમાનો અને વિકલાંગ બાળકો પણ યોગ કરી આકર્ષણનું કેન્દ્ર બન્યા હતા. કાર્યક્રમની તૈયારીના ભાગરૂપે સુરત મ્યુનિસિપલ કોર્પોરેશન અને જિલ્લા વહીવટી તંત્ર દ્વારા 125 બ્લોગ બનાવવામાં આવ્યા હતા, જેમાં અલગ-અલગ બ્લોગ્સ પર LED સ્ક્રીન સ્પીકર્સ સહિતની સુવિધાઓ પૂરી પાડવામાં આવી હતી.