ખેડા જિલ્લામાં સ્થાનિક સ્વરાજ્યની સંસ્થાઓની સામાન્ય અને પેટા ચૂંટણીઓનો કાર્યક્રમ જાહેર
જિલ્લા પંચાયતની ચૂંટણીમાં કુલ ૧૧,૯૭,૫૫૫ મતદારો, નડિયાદ મહાનગરપાલિકા માટે ૧,૯૬,૧૬૨ મતદારો અને ૪ નગરપાલિકાઓની ચૂંટણીમાં ૭૮,૫૬૮ મતદારો કરશે મતદાન
(પ્રતિનિધિ) નડિયાદ, રાજ્ય ચૂંટણી આયોગ, ગાંધીનગર દ્વારા ગત તા. ૦૧/૦૪/૨૦૨૬ ના રોજ સ્થાનિક સ્વરાજ્યની સંસ્થાઓની ચૂંટણીનો કાર્યક્રમ જાહેર કરવામાં આવ્યો છે. જાહેરાતની સાથે જ ચૂંટણી હેઠળના વિસ્તારોમાં આદર્શ આચારસંહિતાનો અમલ શરૂ થઈ ગયો છે આ ચૂંટણી પ્રક્રિયાના સુચારુ સંચાલન હેતુ જિલ્લાના નાગરીકોને યોગ્ય માહિતી પુરી પાડવા હેતુ જિલ્લા ચૂંટણી અધિકારીશ્રી અને કલેક્ટર અમિત પ્રકાશ યાદવ દ્વારા નડીઆદ કલેક્ટર કચેરી ખાતે પ્રેસ કોન્ફરન્સ યોજી ચૂંટણીના કાર્યક્રમ અંગે વિગતવાર માહિતી પુરી પાડી હતી.
જેમાં, કલેક્ટરશ્રીએ ચૂંટણીનું જાહેરનામુ, ચૂંટણી કાર્યક્રમની મહત્વની તારીખો, મતદારોની સંખ્યા, મતદાન મથકો, ચૂંટણી ખર્ચ મર્યાદા અને આચારસંહિતા બાબતે વિગતો રજૂ કરી હતી. કલેક્ટર અમિત પ્રકાશ યાદવે મિડિયાના માધ્યમથી સૌ જિલ્લાવાસીઓને સમગ્ર ચૂંટણી પ્રક્રિયા લોકાભિમુખ અને પારદર્શક રીતે પુર્ણ કરવા જરૂરી સહકાર આપવા અપીલ કરી હતી.
ખેડા જિલ્લાના સંદર્ભમાં ચૂંટણીની મહત્વની તારીખોની વિગતો જોઈએ તો તારીખ ૦૬/૦૪/૨૦૨૬ ઉમેદવારીપત્ર ભરવાનુ શરૂ થશે જેની છેલ્લી છેલ્લી તા. ૧૧/૦૪/૨૦૨૬ રહેશે. તથા ચકાસણી તા. ૧૩/૦૪/૨૦૨૬, ફોર્મ પરત ખેંચવાની છેલ્લી તા. ૧૫/૦૪/૨૦૨૬, મતદાનની તારીખ ૨૬/૦૪/૨૦૨૬ (સવારે ૦૭-૦૦ કલાક થી સાંજે ૦૬-૦૦ કલાક) અને મતગણતરીની તારીખ ૨૮-૦૪-૨૦૨૬ રહેશે.
ચૂંટણીની બેઠકો વિશે જાણીએ તો ખેડા જિલ્લામાં જિલ્લા પંચાયતની કુલ ૪૨ બેઠકો તેમજ નડીઆદ, માતર, ખેડા, મહેમદાવાદ, મહુધા, ઠાસરા, વસો, ગળતેશ્વર અને ફાગવેલ, એમ ૯ તાલુકા પંચાયતોની કુલ ૧૭૬ બેઠકો માટે સામાન્ય ચૂંટણી યોજાશે.
શહેરી વિસ્તારોની વાત કરીએ તો, નડીઆદ મહાનગરપાલિકાના ૧૩ વોર્ડની કુલ ૫૨ બેઠકો અને કપડવંજ, કણજરી, કઠલાલ, ઠાસરા એમ કુલ ૪ નગરપાલિકાઓના ૨૫ વોર્ડની ૧૦૦ બેઠકો માટે મતદાન થશે. આ ઉપરાંત મહેમદાવાદ નગરપાલિકાના વોર્ડ નં ૦૧ ની ૦૨ બેઠકો તથા વોર્ડ નં ૦૫ ની ૦૧ બેઠક એમ કુલ ૦૩ બેઠકોની પેટા ચૂંટણી યોજાશે. તથા મહુધા નગરપાલિકાના વોર્ડ નં ૦૫ ની ૦૧ બેઠકની પેટા ચૂંટણી યોજાશે.
મતદારો વિશે જોઈએ તો, જિલ્લા પંચાયતની ચૂંટણીમાં કુલ ૧૧,૯૭,૫૫૫ મતદારો નોંધાયેલા છે. જેમાં ૬,૧૫,૨૯૬ પુરુષ મતદારો, ૫,૮૨,૦૭૭ મહિલા મતદારો તથા અન્ય કેટેગરીના ૨૨ મતદારોનો સમાવેશ થાય છે.
નડીઆદ મહાનગરપાલિકાના કુલ ૧૩ વોર્ડમાં કુલ ૧,૯૬,૧૬૨ મતદારોમાં ૯૯,૨૦૫ પુરુષ મતદારો, ૯૬,૯૨૩ મહિલા મતદારો તથા ૪૯ અન્ય મતદારોનો સમાવેશ થાય છે. એવી જ રીતે ૪ નગરપાલિકાઓમાં કુલ ૭૮,૫૬૮ મતદારો પૈકી કુલ ૩૯,૮૯૪ પુરષ મતદારો, ૩૮,૬૭૦ મહિલા મતદારો અને અન્ય કેટેગરીમાં ૦૪ મતદારોનો સમાવેશ થાય છે.
મતદાન મથકોની વાત કરીએ તો વહીવટી તંત્ર દ્વારા જિલ્લા પંચાયત માટે ૧૪૬૮, મહાનગરપાલિકા માટે ૨૧૭ અને અન્ય નગરપાલિકાઓ માટે ૮૮ મતદાન મથકો નક્કી કરવામાં આવ્યા છે. તથા પેટા ચૂંટણીની કુલ ૦૨ નગરપાલિકા માટે કુલ ૧૧ મતદાન મથકો નક્કી કર્યા છે. આ તમામ ચૂંટણીઓ ઈવીએમ (EVM) દ્વારા યોજાશે.
