ગુજરાતમાં આગામી બે દિવસ પવન સાથે વરસાદની આગાહી કરવામાં આવી છે
Gujarat Rains: ગુજરાતમાં છેલ્લા કેટલાક દિવસોથી ભારે વરસાદને કારણે નાના-મોટા ચેકડેમો છલકાઈ ગયા છે. આ સાથે રાજ્યની કેટલીક નદીઓ બે કાંઠે વહી રહી છે. ગુજરાતમાં સોમવાર, 3 જુલાઇથી વરસાદ થંભી ગયો છે. ત્યારે રાજ્યમાં ફરી એકવાર ભારે વરસાદની સંભાવના વ્યક્ત કરવામાં આવી છે. ગુજરાતમાં 3 દિવસનો વિરામ લીધા બાદ 6 જુલાઈથી મેઘરાજા ફરી બેટિંગ કરશે.
હવામાન વિભાગની આગાહી મુજબ આગામી 3 દિવસ સુધી ગુજરાતના છૂટાછવાયા વિસ્તારોમાં સામાન્ય વરસાદ પડશે. જો કે આજે સુરત અને ભરૂચ જિલ્લામાં ભારે વરસાદ પડી શકે છે. સરક્યુલેશન સિસ્ટમ સક્રિય થતાં જ 6 જુલાઈથી વરસાદનો બીજો રાઉન્ડ શરૂ થશે. 6 જુલાઈએ અમરેલી, જૂનાગઢ, ગીર સોમનાથ, નવસારી અને વલસાડ જિલ્લામાં ભારે વરસાદ પડશે.
અમદાવાદમાં સામાન્ય વરસાદની આગાહી છે. ગુજરાતના જાણીતા આગાહીકાર અંબાલાલ પટેલના જણાવ્યા અનુસાર આગામી દિવસોમાં 7 થી 15 જુલાઈ દરમિયાન સૌરાષ્ટ્ર-કચ્છ અને ઉત્તર ગુજરાતમાં ભારેથી અતિ ભારે વરસાદ પડશે. આ પછી, 25 જુલાઈથી 8 ઓગસ્ટ સુધી ફરીથી સારો વરસાદ થવાની સંભાવના છે. આ રીતે બે તબક્કામાં મનની વર્ષા થશે.
હવામાન વિભાગના જણાવ્યા અનુસાર 7 જુલાઈએ સુરત, તાપી, ડાંગ, નવસારી, વલસાડ, અમરેલી, ભાવનગર, બોટાદ, જૂનાગઢ, ગીર સોમનાથ જિલ્લામાં ભારે વરસાદ પડશે. માછીમારોને 4 થી 7 જુલાઈ સુધી દરિયો ન ખેડવાની સૂચના આપવામાં આવી છે. કારણ કે, હવામાન વિભાગના જણાવ્યા અનુસાર 4 જુલાઈથી પવનની ઝડપ વધશે.
ગુજરાતમાં આગામી બે દિવસ પવન સાથે વરસાદની આગાહી કરવામાં આવી છે. વરસાદ અંગે અંબાલાલ પટેલે આગાહી કરી છે કે 7 થી 12 જુલાઈ સુધી ઉત્તર ગુજરાત અને સૌરાષ્ટ્ર, કચ્છમાં ભારેથી અતિભારે વરસાદની સંભાવના છે. 25 જુલાઈથી 8 ઓગસ્ટ સુધી ફરી એકવાર વરસાદ પડશે. ગુજરાતમાં આ ચોમાસાની સિઝનમાં અત્યાર સુધીમાં સરેરાશ 11 ઈંચ વરસાદ નોંધાયો છે.