Gujarat Weather Update Today: હવામાન વિભાગે આગામી 5 દિવસ સુધી ગુજરાતમાં આકરી ગરમી પડવાની સંભાવના વ્યક્ત કરી છે. રાજ્યના તાપમાનમાં 2 થી 4 ડિગ્રીનો વધારો થઈ શકે છે અને તાપમાન 44 ડિગ્રી સુધી પહોંચી શકે છે. પોરબંદર, સુરેન્દ્રનગર અને કચ્છમાં હીટ વેવની સંભાવના છે. આજે રાજ્યમાં નોંધાયેલા સૌથી વધુ તાપમાનની વાત કરીએ તો પાટણ અને જૂનાગઢમાં મહત્તમ ગરમી પડી હતી. પાટણમાં 44.6 ડિગ્રી અને જૂનાગઢમાં 44.2 ડિગ્રીએ પારો પહોંચ્યો છે.
હવામાન વિભાગના જણાવ્યા અનુસાર રાજ્યમાં શુષ્ક વાતાવરણ રહેવાની શક્યતા છે. તાપમાનની વાત કરીએ તો આગામી ચાર-પાંચ દિવસમાં તાપમાનમાં બેથી ત્રણ ડિગ્રીનો વધારો થવાની સંભાવના છે. રાજ્યમાં તાપમાનનો પારો 42 થી 44 ડિગ્રી સુધી જઈ શકે છે. દરિયાકાંઠાના વિસ્તારોમાં તાપમાન 40 ડિગ્રી સુધી જઈ શકે છે. સૌરાષ્ટ્ર, કચ્છ અને દક્ષિણ ગુજરાતના ભાગો જેવા દરિયાકાંઠાના વિસ્તારો ગરમ અને ભેજવાળી હવા અનુભવી શકે છે.
આજે રાજ્યમાં ક્યાં અને કેટલું તાપમાન નોંધાયું હતું
11 શહેરોમાં તાપમાન 43 થી 44 ડિગ્રી વચ્ચે છે.
હવામાન વિભાગની આઈએમડી વેબસાઈટમાં પ્રદર્શિત કરાયેલા આંકડા અનુસાર રાજ્યના 11 શહેરો અને જિલ્લાઓમાં તાપમાન 43 થી 44 ડિગ્રી નોંધાયું હતું. જેમાં પાટણમાં સૌથી વધુ 44.6 ડિગ્રી અને જૂનાગઢમાં 44.2 ડિગ્રી તાપમાન નોંધાયું છે. આ ઉપરાંત અમદાવાદમાં 43.5 ડિગ્રી, રાજકોટમાં 43.9 ડિગ્રી અને વડોદરામાં 43.4 ડિગ્રી તાપમાન નોંધાયું છે.