મોરબી, ઈરાન અને ઈઝરાયેલ વચ્ચે વણસેલી યુદ્ધની સ્થિતિની સીધી અસર મોરબીના વિશ્વવિખ્યાત સિરામિક ઉદ્યોગ પર જોવા મળી રહી છે. છેલ્લા એક માસથી ઉત્પાદન એકમો પર તાળા લટકતા અંદાજે સાત હજાર કરોડ રૂપિયાનું ટર્નઓવર જામ થઈ ગયું છે.
આ પ્રતિકૂળ સંજોગોને કારણે પ્રત્યેક કારખાનેદારના શિરે ૫૦ લાખથી ૧.૫૦ કરોડ રૂપિયા સુધીના નુકસાનનો પહાડ આવી પડ્યો છે. માત્ર સિરામિક જ નહીં, પરંતુ તેની સાથે જોડાયેલા પેપર મિલ ઉદ્યોગની હાલત પણ કફોડી બની છે અને તેના પર ૩૬ કરોડ રૂપિયાનું વધારાનું આર્થિક ભારણ આવ્યું છે.મોરબી સિરામિક એસોસિએશનના પ્રમુખ મનોજભાઈ એરવાડિયાએ મીડિયાને જણાવ્યું હતું કે, મોરબીમાં કાર્યરત ૬૫૦ જેટલા સિરામિક એકમો વાર્ષિક ૬૦ હજારથી ૭૦ હજાર કરોડ રૂપિયાનું ટર્નઓવર ધરાવે છે.
જોકે, છેલ્લા એક મહિનાથી ગેસના પુરવઠામાં સર્જાયેલી અછતને પગલે ઉત્પાદન પ્રક્રિયા અટકાવી દેવી પડી છે, જેના પરિણામે અંદાજે સાત હજાર કરોડ રૂપિયાનું ટર્નઓવર અટકી ગયું છે. પ્રોપેન ગેસનો પુરવઠો ખોરવાતા અને નેચરલ ગેસની પૂરતી ઉપલબ્ધતા ન રહેતા સિરામિકના ભઠ્ઠા શાંત થઈ ગયા છે.યુદ્ધના કારણે નિકાસના માર્ગાે પ્રભાવિત થતા ગત એક માસમાં કંડલા અને મુન્દ્રા પોર્ટ પરથી ૭૦૦થી વધુ કન્ટેનરો પરત ફર્યા છે.
આ સિવાય આશરે ૭૦૦થી ૮૦૦ જેટલા કન્ટેનરો વિદેશી બંદરો પર અધ્ધરતાલ ફસાયેલા છે. આ વિલંબને કારણે ઉદ્યોગપતિઓએ કન્ટેનર દીઠ ૫૦ હજારથી ૧.૫૦ લાખ રૂપિયા સુધીનો વધારાનો આર્થિક બોજ સહન કરવો પડી રહ્યો છે. આટલી મોટી નુકસાનીની ભરપાઈ કરવી ઉદ્યોગકારો માટે અત્યારે મુશ્કેલ સાબિત થઈ રહી છે.બીજી તરફ પેપર મિલ એસોસિએશનના પ્રમુખ શૈલેષભાઈ પટેલે મીડિયાને જણાવ્યું હતું કે, મોરબીની પેપર મિલોમાં માસિક ૧.૫૬ લાખ ટન પેપર પ્રોડક્ટ્સનું ઉત્પાદન થાય છે.
જોકે, છેલ્લા ૪૦ થી ૪૫ દિવસથી ચાલી રહેલા યુદ્ધને કારણે પ્રોડક્શન ક્ષમતામાં ૩૦ ટકાનો ઘટાડો નોંધાયો છે. હાલમાં મિલો માત્ર ૬૦થી ૭૦ ટકા ક્ષમતા પર જ કાર્યરત હોવાથી અંદાજે ૪૫ હજાર ટન જેટલું ઉત્પાદન ઘટ્યું છે.વેસ્ટ પેપરના ભાવમાં થયેલા તોતિંગ વધારાએ પેપર મિલ માલિકોની મુશ્કેલી વધારી છે. યુદ્ધના કારણે આયાતી વેસ્ટ પેપરના ભાવમાં ટન દીઠ ૨૫ ડોલરનો ઉછાળો આવ્યો છે.
આ ભાવવધારાને લીધે મોરબીના પેપર મિલ ઉદ્યોગકારો પર માસિક ૩૬ કરોડ રૂપિયાનું ભારણ વધ્યું છે. આગામી સમયમાં આ વધારાના ખર્ચની અસર તૈયાર માલના ભાવ પર પણ પડશે, જેના કારણે પેપર પ્રોડક્ટ્સ મોંઘી થવાની પૂરેપૂરી શક્યતા છે.SS1MS
